1. Ushbu Nizom tuman maktabgacha va maktab taʼlimi bo‘limi (bundan buyon matnda bo‘lim deb yuritiladi)ning maqomi, asosiy vazifalari va funksiyalari, huquqlari va majburiyatlari, shuningdek faoliyatini tashkil etish tartibini belgilaydi.

2. Bo‘lim fuqarolarning ta’limga doir konstitutsiyaviy huquqlariga rioya etilishini ta’minlovchi maktabgacha, maktab va maktabdan tashqari ta’lim sohasida davlat siyosatini Yunusobod tumanida amalga oshirish uchun mas’ul bo‘lgan vakolatli davlat boshqaruvi organi hisoblanadi.

Bo‘lim tuman xalq ta’limi va maktabgacha ta’lim bo‘limlarining huquq va majburiyatlari bo‘yicha huquqiy vorisi hisoblanadi.

3. Bo‘lim o‘z faoliyatida O‘zbekiston Respublikasi Maktabgacha va maktab ta’limi vazirligiga (bundan buyon matnda Vazirlik deb yuritiladi), Toshkent shahar maktabgacha va maktab ta’limi boshqarmasi (bundan buyon matnda hududiy boshqarma deb yuritiladi)ga bo‘ysunadi va hisobot beradi.

4. Bo‘lim o‘z faoliyatida O‘zbekiston Respublikasining Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, Vazirlik va hududiy boshqarmaning Hay’at qarorlari va buyruqlariga, tegishli mahalliy hokimlikning qarorlariga, boshqa normativ-huquqiy hujjatlari, shuningdek, ushbu Nizomga amal qiladi.

5. Bo‘lim o‘z faoliyatini davlat va xo‘jalik boshqaruvi organlari, huquqni muhofaza qiluvchi organlar, mahalliy davlat hokimiyati organlari, fuqarolarning o‘zini o‘zi boshqarish organlari, jamoat birlashmalari va boshqa tashkilotlar bilan o‘zaro hamkorlikda amalga oshiradi.

6. Bo‘lim yuridik shaxs hisoblanadi, O‘zbekiston Respublikasining Davlat gerbi tasviri

 va o‘z nomi tushirilgan muhr va blankalarga, mustaqil balansiga, O‘zbekiston Respublikasi Iqtisodiyot va moliya vazirligi G‘aznachiligining hududiy bo‘linmalarida shaxsiy g‘azna hisob varag‘iga, bank hisob raqamiga ega bo‘ladi.

7. Bo’limning rasmiy nomi:

a) davlat tilida:

to’liq nomi – Yunusobod tumani maktabgacha va maktab ta’limi bo‘limi, qisqartirilgani  -YuTMMTB;

b) rus tilida:

to’liq nomi – Юнусабадский районный отдел дошкольного и школьного образования, qisqartirilgani -ЮРОДШО.

Bo‘limning yuridik manzili (pochta manzili): Yunusobod tumani, Karim Zaripov-7-uy,   Tel.: (+998) 71 212-01-99, faks: (+998) 71 212-01-99, e-mail: yunusobod_txtb@xtv.uz

8. Bo‘lim tuzilmasiga bo‘limning apparati, maktabgacha ta’lim tashkilotlari, maktab va maktabdan tashqari ta’lim muassasalari kiradi.

9. Quyidagilar bo‘limning asosiy vazifalari hisoblanadi:

Vazirlikka va hududiy boshqarmaga yuklangan vazifalar hamda funksiyalar samarali bajarilishini ta’minlashda ishtirok etish;

maktabgacha ta’lim tashkilotlari, maktab va maktabdan tashqari ta’lim muassasalari, faoliyatini tashkil etish sohasida kompleks ijtimoiy-iqtisodiy rivojlantirish bo‘yicha sektorlar bilan o‘zaro hamkorlik qilish;

maktabgacha ta’lim tashkilotlari, maktab va maktabdan tashqari ta’lim muassasalari normativ-huquqiy hujjatlarga rioya qilinishi monitoringini olib borish;

tasarrufidagi davlat va nodavlat maktabgacha ta’lim tashkilotlari, davlat umumiy o‘rta

 va maktabdan tashqari ta’lim muassasalarini yuqori malakali, zamonaviy bilimlarga ega bo‘lgan kadrlar bilan ta’minlanishini muvofiqlashtirish;

maktabgacha ta’lim tashkilotlari, maktab va maktabdan tashqari ta’lim muassasalari o‘quv-metodik faoliyatini muvofiqlashtirish va axborot-kommunikatsiya texnologiyalarini joriy etish;

bolalarni maktabga sifatli tayyorlash masalalari boʻyicha nodavlat taʼlim muassasalari bilan oʻzaro hamkorlik qilish;

nodavlat ta’lim xizmatlarini ko‘rsatuvchi tadbirkorlarni har tomonlama qo‘llab-quvvatlash;

maktabgacha, maktab va maktabdan tashqari taʼlim yoʻnalishlarida tegishliligi boʻyicha davlat xizmatlari koʻrsatilishini taʼminlash;

bolalarni har tomonlama intellektual, axloqiy, estetik va jismoniy kamol toptirish uchun shart-sharoitlar yaratish;

bolalarni milliy va umuminsoniy qadriyatlar, insonparvarlik va yuksak ma’naviyat ruhida tarbiyalash, ularning qalbi va ongiga mustaqillik, insonparvarlik an’analariga sadoqat, milliy o‘zlikni anglash g‘oyalarini yanada chuqur singdirish, “ommaviy madaniyat” ko‘rinishidagi yot g‘oyalarga qarshi immunitetni mustahkamlash choralarini ko‘rish;

maktabgacha taʼlim tashkilotlarini oʻquv-metodik, didaktik materiallar, rivojlantiruvchi oʻyin va oʻyinchoqlar, badiiy adabiyotlar bilan taʼminlash;

3-7 yoshli bolalarni maktabgacha taʼlim bilan bosqichma-bosqich toʻliq qamrab olishni taʼminlash;

davlat xususiy-sheriklik asosidagi ta’lim tashkilotalri faoliyatini tashkil etish yuzasidan tadbirkorlik subyektlarini jalb etish bo‘yicha ishlarni tashkil etadi.

pedagoglarni kasbiy faoliyatiga bog‘liq bo‘lmagan turli xil ishlarga jalb qilinishiga yo‘l qo‘yilmasligini ta’minlash;

idoraviy mansubligidan va mulkchilik shaklidan qat’iy nazar ta’lim muassasalarida davlat ta’lim standartlariga va maktabdan tashqari ta’limga qo‘yiladigan davlat talablariga muvofiq tasarrufidagi ta’lim muassasalari faoliyatini muvofiqlashtirish;

maktab taʼlimi tizimida kasb-hunarga yoʻnaltirish va psixologik-pedagogik xizmat koʻrsatish, ilgʻor tajribalarga asoslangan kasb-hunarga yoʻnaltirishning zamonaviy shakl

 va uslublarini joriy etish;

oʻquvchi-yoshlarning psixologik salomatligini muhofaza qilish, ularning barqaror ijtimoiy va intellektual rivojlanishini taʼminlash;

o‘quvchilarni ijtimoiy reabilitatsiya qilish, turli xil zoʻravonlik koʻrinishlarining oldini olish, suitsidal holatlarga moyilligi boʻlgan oʻquvchilarni barvaqt aniqlash va ularga ijtimoiy-psixologik yordam koʻrsatish;

maktabgacha va maktab taʼlimi tizimida psixologik xizmatni takomillashtirish, psixologlarni metodik qoʻllab-quvvatlash va professional rivojlantirish, xodimlarining pedagogik faoliyatga shaxsiy muvofiqligini oʻrganish;

maktabgacha va maktab taʼlimi tizimida inklyuziv taʼlim uchun shart-sharoitlar yaratish, taʼlim oluvchilar uchun psixologik-pedagogik qoʻllab-quvvatlash; 

umumiy oʻrta taʼlim muassasalari qoshida logopediya shoxobchalarini tashkil etish, ulardagi oʻqituvchi-logopedlarning faoliyatini muvofiqlashtirish, monitoringini olib borish

 va metodik rahbarlikni amalga oshirish;

inklyuziv taʼlimning metodik taʼminotini (dasturlar, rahbar, pedagog va mutaxassislarga metodik tavsiyalar va boshqalarni) ishlab chiqishda ishtirok etish hamda takomillashtirib borish boʻyicha takliflar berish;

inklyuziv sharoitlarda taʼlim oluvchilarni ijtimoiy-psixologik qoʻllab-quvvatlash ishlarini tashkil qilish;

inklyuziv taʼlim tizimi joriy qilingan umumtaʼlim muassasalari, ularda taʼlim olayotgan oʻquvchilar toʻgʻrisida maʼlumotlar bazasini yaratish va uni doimiy yangilab borish;

inklyuziv taʼlimni rivojlantirish masalalari boʻyicha oʻquv-seminarlarni tashkil etish;

tuman darajasidagi byudjetdan moliyalashtiriladigan maktabgacha ta’lim tashkilotlari, maktab va maktabdan tashqari ta’lim muassasalari xarajatlarini moliyalashtirishni, ularda buxgalteriya hisobi va hisoboti yuritilishini tashkil etish;

markazlashtirilgan moliya-buxgalteriya xizmati tomonidan qamrab olingan maktabgacha va umumta’lim ta’lim tashkilotlarining xarajatlar smetalari, shtatlar jadvallari va tarifikatsiya ro‘yxatlarini o‘z vaqtida shakllantirilishini, tasdiqlanishini hamda zarur hollarda ularga o‘zgartirish va qo‘shimchalar kiritilishini ta’minlash;

markazlashtirilgan moliya-buxgalteriya xizmati tomonidan qamrab olingan umumta’lim va maktabgacha ta’lim tashkilotlari xodimlariga ish haqi va unga tenglashtirilgan to‘lovlar to‘lash, shuningdek, homiladorlik va tug‘ish bo‘yicha nafaqa talabnomalarni o‘z vaqtida taqdim etish va to‘lash.

10. Bo‘lim quyidagi funksiyalarni amalga oshiradi:

bo‘lim va uning xodimlari faoliyatini tashkil etadi;

idoraviy mansub tashkilotlar va muassasalar tomonidan O‘zbekiston Respublikasi qonunlari, O‘zbekiston Respublikasi Oliy Majlisi palatalarining qarorlari va topshiriqlari, O‘zbekiston Respublikasi Prezidentining farmonlari, qarorlari va farmoyishlari va topshiriqlari, O‘zbekiston Respublikasi Vazirlar Mahkamasining qaror va farmoyishlari, topshiriqlari, Vazirlik va hududiy boshqarma Hay’at qarorlari, buyruqlari hamda boshqa topshiriqlari va ko‘rsatmalarining bajarilishini muntazam nazorat qiladi;

maktabgacha ta’lim tashkilotlari, maktab va maktabdan tashqari ta’lim muassasalari faoliyatiga rahbarlik qiladi, muvofiqlashtiradi va nazorat qiladi, ta’lim-tarbiya jarayoniga muvofiqlashtiradi;

maktabgacha ta’lim tashkilotlari, maktab va maktabdan tashqari ta’lim muassasalari nodavlat ta’lim xizmatlari ko‘rsatish faoliyatini amalga oshiradigan yuridik shaxslar bilan o‘zaro hamkorlik qiladi;

nodavlat ta’lim xizmatlari ko‘rsatish faoliyatini amalga oshiradigan yuridik va yakka tartibdagi tadbirkorlarni qo‘llab-quvvatlashni amalga oshiradi hamda maktabgacha ta’lim tashkilotlari, maktab va maktabdan tashqari ta’lim muassasalari ta’lim berishning muqobil shakllarini rivojlantiradi;

tuman darajasidagi byudjetdan moliyalashtiriladigan maktabgacha ta’lim tashkilotlari, maktab va maktabdan tashqari ta’lim muassasalari xarajatlarining buxgalteriya hisobi va hisoboti yuritilishini tashkil etadi;

maktabgacha ta’lim tashkilotlari va maktablarda sog‘lom ovqatlanishni tashkil etadi hamda oziq-ovqat zaxirasi bo‘yicha talablarni shakllantiradi, ovqatlantirish me’yorlari asosida ovqatlantirishni tashkil etishni monitoring qiladi;

maktabgacha ta’lim tashkilotlari, maktab va maktabdan tashqari ta’lim muassasalari, davlat ta’lim standartlari va davlat talablarini bajarish monitoringini amalga oshiradi;

maktabgacha ta’lim tashkilotlari, maktab va maktabdan tashqari ta’lim muassasalari moddiy-texnik ta’minlashni tashkil etadi;

maktabgacha ta’lim tashkilotlari, maktab va maktabdan tashqari ta’lim muassasalarining binolari va inshootlaridan foydalanish ishlari monitoringini olib boradi va muvofiqlashtiradi;

jismoniy va yuridik shaxslarning murojaatlari bilan ishlashni tashkil etadi;

bo‘lim vakolatiga tegishli bo‘lgan operativ, tashkiliy, kadrlar, moliya, ishlab chiqarish-xo‘jalik masalalari va boshqa masalalar bo‘yicha buyruq qabul qiladi;

maktabgacha ta’lim tashkilotlari, maktab va maktabdan tashqari ta’lim muassasalari

ish amaliyotiga davlat ta’lim standartlari, ilmiy yutuqlar va ilg‘or pedagogik tajribalarning tatbiq etilishiga sharoit yaratadi;

ilg‘or pedagoglar, maktabgacha ta’lim tashkilotlari, maktab va maktabdan tashqari ta’lim muassasalarining ijobiy ish tajribasini o‘rganadi hamda umumlashtiradi, ta’lim muassasalaridagi o‘quv-metodik va tarbiyaviy ishlarni amalga oshirish davomida uni tumanda ommalashtiradi hamda shahar, Respublika miqyosida ommalashtirishga tavsiya etadi;

ta’til davrlarida bolalarni mazmunli dam olishlarini tashkil etadi;

maktabgacha ta’lim tashkilotlari, maktab va maktabdan tashqari ta’lim muassasalarini darsliklar, o‘quv dasturlari va o‘quv rejalari, o‘quv-ko‘rgazmali qo‘llanmalar va o‘quv uskunalari, ta’limning texnik vositalari, qo‘llanma-metodik adabiyotlar bilan ta’minlash ishlarini amalga oshiradi;

maktablarda qat’iy nazoratdagi o‘quv hujjatlarining to‘g‘ri yuritilishini, bitiruvchilarga shahodatnoma, “oltin” va “kumush” medallar berilishini nazorat qiladi;

maktab bitiruvchilarini kollejlar va texnikumlar, oliy o‘quv yurtlariga o‘qishga kirishi, 9-sinf o‘quvchilarining istaklariga ko‘ra umumiy o‘rta ta’lim muassasalari 10-sinfida yoki akademik litseylar, kasb-hunar maktablarida ta’lim olishini davom ettirishi bo‘yicha targ‘ibot-tashviqot ishlarini tashkil etadi hamda natijadorligini monitoring qiladi;

maktabgacha ta’lim tashkilotlari va maktabga qamrov ko‘rsatkichlarining loyiha bo‘yicha quvvati bilan to‘ldirilganlik koeffitsiyenti o‘rtasidagi farqni kamaytirish choralarini ko‘radi;

umumiy o‘rta ta’lim hajmida, tibbiy ko‘rsatmalar asosida bolalarning uyda yakka tartibda ta’lim-tarbiya olishiga sharoit yaratish ustidan nazoratni amalga oshiradi;

ta’lim muassasalarining ota-onalar, fuqarolarning o‘zini-o‘zi boshqarish organlari, jamoat tashkilotlari, jamg‘armalar bilan ijodiy faol, davlat mustaqilligi g‘oyalariga sadoqatli va jamiyat taraqqiyotiga aniq hissa qo‘shishga layoqatli shaxsni kamol toptirish bo‘yicha o‘zaro yaqin hamkorligini tashkil etilishini ta’minlaydi;

bolalarni boshlang‘ich ta’limga tayyorlash masalalarida hamkorlikni yo‘lga qo‘yadi;

ta’lim jarayoniga axborot-kommunikatsiya texnologiyalarini joriy etilishi va ulardan samarali foydalanishni hamda pedagog xodimlarni shu sohadagi malakasini oshirilishini ta’minlaydi;

o‘quvchilar bilan maktabdan tashqari bo‘sh vaqtlarini mazmunli tashkil etish choralarini ko‘rish;

o‘quvchilarning davomatini to‘liq ta’minlash yuzasidan aniq choralar ko‘rish va nazorat qilish, bu borada ta’lim muassasalarining, fuqarolarning o‘zini o‘zi boshqarish organlari

va fuqarolik jamiyatining boshqa institutlari, huquqni muhofaza qiluvchi organlar va ota-onalarning o‘zaro hamkorlikdagi ishlarini tashkil etadi va muvofiqlashtiradi;

maktabgacha ta’lim tashkilotlari, maktab va maktabdan tashqari ta’lim muassasalari, malakali mutaxassislar bilan ta’minlash bo‘yicha chora-tadbirlar qabul qiladi;

pedagog xodimlarni mehnatdagi yuqori ko‘rsatkichlari, o‘quvchi yoshlarni o‘qitish va tarbiyalashdagi faol ishtiroki uchun davlat va tarmoq mukofotlariga belgilangan tartibda tavsiya etadi;

maktabgacha ta’lim tashkilotlari, maktab va maktabdan tashqari ta’lim muassasalari qurilish-ta’mirlash ishlari olib borilishi va ularning zarur jihozlar bilan ta’minlanishi, ta’lim muassasalarining kuzgi-qishki mavsumga tayyorgarligi ustidan nazoratni amalga oshiradi;

maktabgacha ta’lim tashkilotlari, maktab va maktabdan tashqari ta’lim muassasalari tomonidan zamonaviy moddiy-texnika bazasi, shu jumladan o‘quv-laboratoriya asbob-uskunalari, kompyuter texnikasi, mebellar, sport inventarlari va jihozlaridan samarali foydalanilishini nazorat qiladi;

Respublika va mahalliy byudjet hisobidan moliyalashtiriladigan maktabgacha ta’lim tashkilotlari, maktab va maktabdan tashqari ta’lim muassasalari bino va inshootlarining mavjud holati to‘g‘risidagi bazani shakllantirish, qurish, rekonstruksiya qilish, mukammal va joriy ta’mirlanishi bo‘yicha har yili Manzilli dasturlarni shakllantirish uchun tegishli takliflarni hududiy boshqarmaga taqdim etadi;

maktabgacha ta’lim tashkilotlari, maktab va maktabdan tashqari ta’lim muassasalari mavjud qozonlar bo‘yicha bazani shakllantirish, samarali foydalanishni hisobga olib talabnomalar tayyorlash, shuningdek mavjud bazadan kelib chiqib, jihozlash va to‘ldirib jihozlash manzilli ro‘yxatlari bo‘yicha takliflar beradi, manzilli ro‘yxatlarni o‘rganadi va shakllantiradi, ularning monitoringini yuritadi va hududiy boshqarmaga taqdim etadi;

talab bo‘yicha investitsiya va boshqa dasturlarga kiritish uchun maktabgacha ta’lim tashkilotlari, maktab va maktabdan tashqari ta’lim muassasalari ob’ektlari bo‘yicha ma’lumotlarni hududiy boshqarmaga taqdim etadi;

byudjet tashkilotlarining sanitariya normalari va qoidalariga mosligini ko‘rish maqsadida tizimli ravishda ularni doimiy o‘rganish, kuz-qish mavsumida bino va inshootlaridan to‘g‘ri foydalanish uchun kerakli shart-sharoitlarni ta’minlash choralarini ko‘radi;

bo‘limning va markazlashgan buxgalteriya tomonidan xizmat ko‘rsatiladigan ta’lim muassasalarining shtat jadvallarini va xarajatlar smetalarini byudjetdan ajratiladigan mablag‘lar doirasida va amaldagi qonun hujjatlariga muvofiq shakllantiradi va tasdiqlaydi;

har bir muassasaning pul mablag‘lari, hisob-kitob va moddiy qimmatliklar, shuningdek, boshqa aktivlar va majburiyatlar inventarizatsiyasini o‘tkazadi, inventarizatsiya natijalari to‘g‘ri rasmiylashtirilishi hamda ularning buxgalteriya hisobida aks ettirilishini ta’minlaydi;

buxgalteriya hujjatlari, hisob registrlari, xarajatlar smetasi va ularning ilovalari, shuningdek, byudjet tashkilotlari moliyaviy faoliyatiga oid boshqa hujjatlar hisobini har bir muassasa kesimida alohida yuritilishi va saqlanishini ta’minlaydi;

bo‘lim apparati va markazlashgan mablag‘lari xarajatlari bo‘yicha to‘lovlarni amalga oshirish, bo‘limning moddiy boyliklari, xodimlarning mehnatiga haq to‘lash va bo‘lim faoliyatiga doir boshqa xizmatlar bo‘yicha amaldagi qonunchilik talablariga asosan hisob-kitoblarni amalga oshiradi;

markazlashtirilgan moliya-buxgalteriya xizmati tomonidan qamrab olingan umumta’lim tashkilotlarining sinf komplektlarini amaldagi qonunchilikda belgilangan me’yorlar asosida o‘quvchilar bilan to‘ldirilishini ta’minlaydi;

markazlashtirilgan moliya-buxgalteriya xizmati tomonidan qamrab olingan umumta’lim va maktabgacha ta’lim tashkilotlarining xarajatlar smetalari, shtatlar jadvallari va tarifikatsiya ro‘yxatlarini o‘z vaqtida shakllantirilishini, tasdiqlanishini hamda zarur hollarda ularga o‘zgartirish va qo‘shimchalar kiritilishini ta’minlaydi;

markazlashtirilgan moliya-buxgalteriya xizmati tomonidan qamrab olingan umumta’lim va maktabgacha ta’lim tashkilotlari xodimlariga ish haqi va unga tenglashtirilgan to‘lovlar to‘lanishini, shuningdek, homiladorlik va tug‘ish bo‘yicha nafaqa talabnomalarni o‘z vaqtida taqdim etilishini va to‘lanishini ta’minlaydi;

bo‘lim tasarrufidagi tashkilot va muassasalarda xizmat ko‘rsatish va servis sohasini rivojlantirish ishlariga umumiy rahbarlik qiladi, muassasalardan ma’lumotlarni yig‘ib umumlashtiradi va hududiy boshqarmaga taqdim etadi;

buxgalteriya hisobi va hisobotini amaldagi normativ-huquqiy hujjatlarga amal qilgan holda yuritish, shuningdek hisob ishlarini zamonaviy texnik vositalar va axborot texnologiyalaridan foydalangan holda tashkil etadi;

tizimda odob-axloq qoidalariga rioya qilinishini ta’minlash, korrupsiyaga qarshi kurash, aniqlangan qonunbuzilishi holatlarini, ularni sodir etishga imkon yaratuvchi sabablar va shart-sharoitlarni bartaraf etish, oldini olish choralarini ko‘radi.

Bo‘lim qonun hujjatlariga muvofiq boshqa funksiyalarni ham bajarishi mumkin.

11. Bo‘lim quyidagi huquqlarga ega:

davlat va xo‘jalik boshqaruvi organlari, mahalliy davlat hokimiyati organlari tuman bo‘linmalaridan o‘z vakolatiga kiradigan masalalarni hal qilish uchun zarur bo‘lgan axborotni belgilangan tartibda so‘rab olish;

o‘z vakolati doirasida takliflarni ko‘rib chiqish uchun tegishli hududiy boshqarma va mahalliy hokimliklarga kiritish;

maktabgacha ta’lim tashkilotlari, maktab va maktabdan tashqari ta’lim muassasalari faoliyatiga rahbarlik qilish;

o‘z vakolatlari doirasida seminarlar, ko‘rgazmalar o‘tkazish, shuningdek, boshqa tashkilotlar tomonidan o‘tkaziladigan shunday tadbirlarda ishtirok etish;

o‘z faoliyatini keng yoritish maqsadida ijtimoiy tarmoqlarda o‘z sahifalarini yaratish;

hay’at yig‘ilishlarida bo‘lim vakolatiga kiruvchi masalalar bo‘yicha maktabgacha, maktab va maktabdan tashqari ta’lim muassasalari rahbarlarining hisobotlarini eshitish.

Bo‘lim qonun hujjatlariga muvofiq boshqa huquqlarga ham ega bo‘lishi mumkin.

12. Bo‘lim majburiyatlari:

Bo‘limga yuklatilgan vazifalar va funksiyalarning sifatli va o‘z vaqtida bajarilishini ta’minlash;

hududiy boshqarmaga kiritiladigan hujjatlar loyihalari va takliflar, shuningdek, bo‘lim tomonidan qabul qilinadigan qarorlarni ijrosini ta’minlash;

maktabgacha va maktab ta’limi sohasida dolzarb muammolarni, aholini qiynayotgan masalalarni aniqlash hamda ularni bartaraf etish;

tuman maktabgacha va maktab ta’limi sohasini rivojlantirish, shuningdek, maktabgacha ta’lim tashkilotlari, maktab va maktabdan tashqari ta’lim muassasalari hududni ijtimoiy-iqtisodiy rivojlantirish va muammoli masasalarni hal qilish bo‘yicha dasturlar, “yo‘l xaritalari” va boshqa hujjatlarda belgilangan topshiriqlarning tegishliligi bo‘yicha samarali amalga oshirilishi uchun javob beradi.

13. Bo‘limga hududiy boshqarma boshlig‘ining tavsiyasiga ko‘ra O‘zbekiston Respublikasi maktabgacha va maktab ta’limi vaziri tomonidan lavozimga tayinlanadigan va lavozimdan ozod etiladigan boshliq rahbarlik qiladi.

Bo‘lim boshlig‘i bo‘lmagan davrda uning vakolatlari hududiy boshqarma boshlig‘i buyrug‘i bilan tayinlangan mas’ul shaxsga yuklatiladi.

14. Bo‘lim boshlig’i idoraviy mansub ta’lim muassasalarining nizomini o‘rnatilgan tartibda tasdiqlaydi.

15. Bo‘limning shtat jadvali o‘rnatilgan tartibda bo‘lim boshlig‘i tomonidan tasdiqlanadi.

16. Bo‘limning tarkibiy bo‘linmalari hududiy boshqarmaning tarkibiy bo‘linmalari bilan hamkorlik qiladi, jumladan:

hududiy boshqarma rahbariyati topshiriqlari ijrosi haqida axborot beradi;

maktabgacha va maktab ta’limi sohasida qonun hujjatlarini amalga oshirish bo‘yicha faoliyat natijalari to‘g‘risida hududiy boshqarmaga axborot taqdim etadi;

ularning faoliyatini o‘rganish natijasida aniqlangan ishdagi kamchiliklar va qoidabuzarliklarni bartaraf etish natijalari to‘g‘risida ma’lumot beradi;

o‘z faoliyati natijalari to‘g‘risidagi hisobotlarni belgilangan tartibda va muddatlarda hududiy boshqarmaga taqdim etadi;

maktabgacha va maktab ta’limi muammolarini hal qilishga qaratilgan takliflarni hududiy boshqarmaga taqdim etadi;

kompleks ijtimoiy-iqtisodiy rivojlantirish bo‘yicha sektorlar bilan o‘zaro hamkorlik natijalari to‘g‘risida axborot beradi;

vakolatli organlar tomonidan o‘tkazilgan o‘z faoliyatini tekshirish natijalari to‘g‘risida xabar beradi.

17. Shtat jadvaliga muvofiq belgilangan xodimlar idoraviy mansub tashkilotlar bilan o‘z faoliyati yo‘nalishlari bo‘yicha hamkorlik qilib:

- topshiriqlarni idoraviy mansub tashkilotlarga yetkazadi hamda ularning bajarilishini nazorat qiladi;

- idoraviy mansub tashkilotlarga tarkibiy bo‘linmaning bevosita faoliyati masalalari bo‘yicha so‘rovlar yuboradi hamda ularning ijro etilishini nazorat qiladi;

- idoraviy mansub tashkilotlar faoliyatini o‘rganadi, umumlashtiradi, uni takomillashtirishga qaratilgan chora-tadbirlarni ishlab chiqadi;

- idoraviy mansub tashkilotlar faoliyatini tashkil etish va faoliyati natijalari to‘g‘risida hisobot va axborot materiallari, statistik va boshqa ma’lumotlar o‘rganilishini tashkil etadi;

- idoraviy mansub tashkilotlar ish rejalarini tahlil qiladi, ularning faoliyatini rejalashtirishni takomillashtirishga doir chora-tadbirlar ko‘radi;

- idoraviy mansub tashkilotlardan tushgan takliflarni ko‘rib chiqadi, yuqori turuvchi idoralar vakolatiga kiradigan masalalar yuzasidan takliflarni bo‘lim boshlig‘iga kiritadi.

18. Bo‘lim o‘z vazifalari va funksiyalarini amalga oshirishda o‘z vakolati doirasida boshqa davlat va xo‘jalik boshqaruvi organlari, mahalliy davlat hokimiyati organlari hamda jamoat tashkilotlari bilan hamkorlik qiladi.

19. Bo‘lim tegishli hududlarni ijtimoiy-iqtisodiy rivojlantirish bo‘yicha “yo‘l xaritalari”ni ishlab chiqishda va amalga oshirishda kompleks ijtimoiy-iqtisodiy rivojlantirish bo‘yicha sektorlar bilan o‘zaro yaqin hamkorlik qiladi.

20. Bo‘limning moddiy-texnik ta’minoti va xodimlari mehnatiga haq to‘lash O‘zbekiston Respublikasi Davlat byudjeti mablag‘lari va qonun hujjatlarida taqiqlanmagan boshqa manbalar hisobiga moliyalashtiriladi.

21. Bo‘lim faoliyati davomida xodimlarni moddiy va ma’naviy rag‘batlantirish hamda ijtimoiy muhofaza qilishni amaldagi qonun hujjatlariga muvofiq amalga oshiradi. 

22. Bo‘lim xodimlarining ish haqi lavozim maoshi, mukofotlar, qo‘shimcha haqlar, ustamalar, moddiy rag‘batlantirish, moddiy yordam va qonun hujjatlarida nazarda tutilgan boshqa to‘lovlardan iborat bo‘ladi.

23. Bo‘lim xodimlariga oylik ustamalar va moddiy rag‘batlantirishlar tarzidagi lavozim maoshlariga qo‘shimcha to‘lovlar amaldagi normativ-huquqiy hujjatlarga muvofiq to‘lanadi.

 

24. Bo‘limni qayta tashkil etish va tugatish qonun hujjatlarida belgilangan tartibda amalga oshiriladi.